欢迎访问 单单理财网
你的位置:首页 > 财经 > 正文

【古天后日誌】港股五行欠水 表现反覆难有作为

时间: 2019-07-15 14:38:50

【古天后日誌】港股五行欠水 表现反覆难有作为

  7月10日,多云,有骤雨甚至雷雨,不过呢两日就算间中有几阵雨,天气依然咁闷热。华尔街等紧今晚鲍爷出席听证会,并就货币政策发表讲话,投资者态度稳阵,美股则个别发展。道指隔晚连跌第三个交易日,不过标指跟纳指则回升,终止跌势。虽然隔晚鲍爷已率先露面,但未有提及货币政策,市场仍等待今晚听证会,希望能够搵倒更多息率走势嘅线索。不过利率期货显示,市场预期今个月联储局减息0.25厘嘅机会超过九成。

  港股隔晚喺夜期跟ADR均升逾百点,目前恒指喺新加坡黑期亦升逾百点,于28200点水平附近徘徊。不过港股经过上月反弹过后,呢几个交易日开始反覆向下,虽然成交未见增加,表面睇沽压唔算严重,但咁样阴乾下跌,相对起狠狠一跌更为阴湿,最易令人堕入反弹追货,回软止蚀嘅恶性偱环。重点係港股反弹一直未有重返29000水平企稳,29400嘅牛熊分界更加连影都冇,而成交持续缩水,向上突破动力欠奉。归根究底,港股回复弱势都係缺水所致,已撤走嘅资金短期未必回流,港股呢期五行欠水,就连炒股唔炒市呢招都唔多就手,似乎咁嘅市况,放暑假轻鬆一下,总好过日日对住个市磨烂席。

  个股方面,之前曾随大市反弹嘅小米集团(01810) 股价及相关新闻 ,上市已届一周年,再有大批股份解冻,上市前投资者连同三名联合创办人解禁股份,合计超过40亿股,呢批股份嘅市值高达400亿元。睇番小米股价已较招股价17元跌咗四成,股价喺上月更创下8.91元上市低位,即使公司曾多次进行回购,但公司呢边回购,那边厢就以超低价再印股票,发行新股予员工回购。而所谓嘅「2012年僱员股份奖励计划」,小米最多可授出25.13亿股予僱员或前僱员,以低至0.39港元至2.2881港元发行新股予员工认购,变相小米街货愈嚟愈多。重点係呢批「奖励股」仲要係平到跌渣,散户喺街扫货,再平都好,都要买贵呢批奖品N咁多倍,散户权益更持续被摊薄。

  另一方面,小米一直以「互联网公司」自居,九成收入靠硬件,「智能手机」佔集团收入67.5%,而「IoT与生活消费产品」如智能电视、笔记本电脑及小米手环等就佔22.4%,两者佔小米总收入九成。说穿了,小米更似係一间低端手机製造商,根本难以享有较高溢价估值,当初17元嘅招股价自然站唔住脚。一年前小米上市之际,古天后并唔睇好,一年后对小米睇法未有改变。

  古天后

  (徐狄怡,证监会持牌人 汇盈资产管理 董事总经理)

新闻标题: 【古天后日誌】港股五行欠水 表现反覆难有作为
新闻标签: 提名(1)
Top